الجي بي اس مافيه شك انه مهم ولا له غناه بعد الله سبحانه وتعالى وفادني كثير في امريكا، امشي واروح واجي عليه خصوصا برى مدينتي في السفر او الاستكشاف ابد امسك الطريق لين امل في اي جهه شرق ولا غرب، بزلفت ولا بدون زفلت ثم اذا بغيت ارجع طلبت العوده للبيت ثم رجعني للبيت زايد انه يعلمك وين المحطات والمطاعم واماكن الترفيه وفيه ميزه العناوين وهذي ممتازه حيث انك عندما تريد اي محل فقط تدخل المعلومات اسم الشارع ورقم المحل ورقم المنطقه ثم يقوم الجهاز بتوصيلك وممكن انك من مدينتك تقوم بادخال عنوان الملحقيه في واشنطن ثم يقوم بأيصالك الى باب الملحقيه بالضبط، تصبح على المزيد كل يوم.
هذا عن جهاز تحديد المواقع بشكل عام
اما الانواع فهي كثيره، انا بحثت فتره طويله وبصراحه ماعندي خبره يعتمد عليها لكن اني افضل نوعين اللي الاول قارمن والثاني ماجلان وفيه سوني بعد مثلها ماهو ردي يمدحه لي احد الامريكان اللي يستخدمونه.
فالبدايه هو لك وللزمن تحتاجه الين نهايه الدراسه وممكن انك تاخذه للسعوديه معك وتنزل خرائط السعوديه لذلك لا تشري الا شي طيب
كنت ناوي ادفع 300 دولار بس ثم يوم شفت الاسعار وسألت عنها قلت خلني ادفع 600 ماهو خساره اهم شي ما اشري شي اندم عليه والمثل يقول ( الرخيص مخيس) تكرمون يا شباب ويا شابات
عموما متوسط الاسعار 500 الى 600 والباقي رخيص ما يجيب لك شي طيب او غالي زايد عن الحاجه يعني ماهو لك حق ناس محترفين وحقين صيد ورحلات وفيه مواصفات طقس وخرائط جيولجيه واشياء كثيره
انواع الاجهزه
الجي بس اس انواع فيه شي يدوي وفيه شي للسياره وفيه نوع للسياره بس تقدر تفكه وتشيله معك
اجهزه انصحك الاطلاع عليها
هناك انواع من الاجهزه وهي تعمد على استخدامك لكن شوف الاربعه انواع هذي
1- Garmin StreetPilot 2610 GPS نفس اللي معي وممتاز جدا وراح اتكلم عنه بعد شوي.
2- garmin nuvi 350 وهذا فيه نوع منه رقمه 660 اغلى واحسن هذا فيه ميزه MP3 ومميزات ترفيهيه يعني جامعينها سواء كذلك تقدر تفكه معك برى السياره لان بعضها لازم يكون مشبوك دائما في السياره او الكهرباء وهذي ميزه ممتازه لانه في بعض الحالات ما تقدر تخلي جهاز غالي بالسياره وفيه سبب قوي وهو لو تسافر لمدينه ما تعرفها زين مثل نيويورك طبعا راح توقف سيارتك بس تخاف انك تضيع مكانها وتكون في قلق وانت تتمتع برحلتك ( وين السياره وين وقفنا ، باي شارع، احفظ الشارع هذا ، دخلنا من هنا وطلعنا من هنا ) لكن مع الجهاز هذا تقدر تخزن احداثيات مكان المواقف وتتكل على الله ثم تروح ثم اذا مليت اطلب مكان السياره وهو يوديك لسيارتك وكذلك فيه ميزه صغر الحجم.
- Garmin StreetPilot 330C هذا ممتاز ورخيص وفيه واحد نفسه وارخص منه بس بدون الوان يمكن تلقاه بالسوق خصوصا عن طريق مواقع التسوق عن طريق النت في نفس الموقع يطلع عليك 200$ الى 300$ << احتمال ، انا في البدايه كنت باشري هذا بس لقيت افضل منه وهي تعتمد على حاجتك انت يمكن هذا يكفيك
4- sony GPS رقم الموديل ماني متأكد لكن شركه سوني ما انتجت الا تقريبا 4 انواع انا اعجبني وممتاز وزي ما قلت مدحه لي احد الامريكان عنده واحد لكن انا فضلت قارمن لان قارمن عندهم خبره بالجي بي اس اكثر من سوني ، والله العالم يمكن يكون سوني افضل من قارمن وسعره معقول ماهو غالي مره.
معايير يجب مراعاتها عند شراء الجهاز
الاجهزه تختلف بالمواصفات بعضها تقنيه وبعضها شكليه، لكن باوضح لك بعض الاختلافات
1- الحجم
2- شاشه اللمس بعضها موجود والبعض الاخر غير موجود فيه هذه الميزه
3- الرموت << ميزه ممتازه وعمليه جدا لكن ماهي بذاك الاهميه
4- الشحن : بعض الاجهزه تشحنها مثل الجوال وبعضها لازم يكون متصل بالكهرباء طول الوقت.
5 الصوت : يعني يعطيك التوجيهات صوتيه
هذي السهله نجي الان في العميق
6- الخطوط البديله: بعض الاجهزه في خيارات رهيبه ولا يتساهل فيه الا وهي الخطوط البديله وهذي طول الله عمرك اذا كنت رايح مدينه تبعد 500 ميل ثم بعد 400 ميل لقيت الخط مسكر فيه حفريات وش تسوي ( طبعا دائما تحصل مع اهل خرائط ماب كويست) في الحاله هذي الجهاز يطلع لك خط بديل غير الخط هذا
وفيه حاله ثانيه : اذا كنت في مدينه مزدحمه مثل شيكاقو ثم اجباري تعديت المخرج طبعا الجهاز على طول يدبر لك خط ثاني ولو تعدى الخط البديل الثاني يطلع لك خط ثالث وهكذا يعني ماعليك خوف بأذن الله وهذي الميزه تختلف قوتها من جهاز الى جهاز بس افضلها على حسب اخر استفتاء سواه موقع امريكي ناسي اسمه قال ان Garmin StreetPilot 2710 هو افضلها وكذلك الجهاز اللي معي Garmin StreetPilot 2610 بعد مثلك مجربه ممتازه جدا جداً
7- نوع الطريق المفضل: وهذي طول الله عمرك اذا كنت تبي تروح لمكان ما ثم ودك ان تأخذ الخط حواري يقوم الجهاز يوصلك لمكانك المطلوب عن طريق شوارع فرعيه ما تمر على طرق رئيسه الا نادرا يعني حواري في حواري << يصلح حق مهربين ولا الشباب اللي مامعه رخصه يقطعون الطريق مايشوفون الحكومه.
وفيه حاله ثانيه: انت رجال معك عائله ومسافر وتبي تروح لفلوريدا ولا تبي الجهاز يدخلك مع شوارع حواري او شوارع مظلمه ومشبوهه او مقّطعّه ما فيه ولا سياره تطلب من الجهاز انه يعطيك خطوط رئيسيه بس يقوم الجهاز يرسم لك خط رئيسي بس يعني على الهاي وي بس وهذا ممتاز دائما استخدمه تعرف يعني ما تسوي عليك في مدينه ديترويت مثلا تضيع وتدخل حواري ثم تروح غلطه عند المجرمين اللي هناك لذلك خلك في السليم ولا تمشي الا في شوارع رئيسيه فيها شرطه وامن طرق.
8- طول او قصر الوقت والمسافه: طبعا الجهاز يحسب لك المسافه والوقت وبعض الاحيان تكون مستعجل فأنت تطلب اقصر وقت وبعض الاحيان تكون مقطوع من البنزين فتطلب اقصر مسافه. تعتمد عليك وعلى طلبك.
9- الذاكره : بعض الاجهزه يجي معه ذاكره تنزل فيه الخرائط لذلك اذا كنت تبي تنزل امريكا لازم تشري ذاكره عاليه وفيه بعضها تجي بدون ذاكره وتكون الخرائط موجوده تلقائيا في الجهاز.<< طبعا انا ما شفت الشي هذا لكن احد الشباب يقول انا شاري garmin nuvi 350 مع خرائطه جاهز.
10 - البحث : هذه الميزه للبحث عن انواع الفنادق فثلا لو كنت مسافر وبغيت ترتاح شوي تطلب من الجهاز جميع الفنادق القريبه وتطلع لك كل الفنادق وكذلك المطاعم والاماكن الحكوميه والمستشفيات والشرط واماكن الترفيه واماكن التسوق.
12 حفظ المواقع : وهي اذا لقيت مكان اعجبك وودك ترجع له ، تقوم بحفظ الموقع وتخزينه بالجهاز طبعا هذه الميزه موجوه في جميع الاجهزه لكن تختلف من جهاز الى جهاز
الان بأتكلم عن جهازي اللي شريته لاني اعرفه زين واقدر اتفلسف مزبوط
لا ياشباب امزح بس اقصد يعني الواحد يتكلم عن تجربه افضل،
Garmin StreetPilot 2610
هو افضل جهاز لقيته يكفني وقد يكون زايد عن الحاجه شوي لان فيه اشياء ما عرفتها الى الان
الجهاز متوسط الحجم يعني بججم كف اليد مرتين ومعه رموت شريته من موقع امازون 600 مع الشحن
المميزات :
1-شامل لكل المعلومات اللي تحتاجها واشياء اخرى لا تتوقعها.
2- شاشه لمس
3 ريموت << هذه الميزه عمليه جدا خصوصا اذا كنت تتحكم بالجهاز وانت تقود السياره
4- ميزه الطريق البديل، ميزه طول وقصر الطريق، البحث ، الطريق المفضل.
الحقيقه الجهاز ممتاز جدا واعجبني ولا استغنى عنه ولم اجد افضل منه لكن فيه بعض العيوب
ودائما افضل الشخص الذي يعطني العيوب لان المميزات سلهه ويمكن الحصول عليها من المحل البائع لكن العيوب لا تجد من يخبرك بها تكتشفها انت بنفسك لكن بعد فوات الاوان
للتذكير انا اتكلم عن جهاز Garmin StreetPilot 2610
1- الشاحن يجب ان يكون دائما موصول بالسياره
2- يأتي معه ذاكره 28 فقط وهذي غير كافيه خصوصا للسفر من اوهايو الى نيويورك لذلك يفضل شراء ذاكره اكبر ، 2 قيقا تكفي لامريكا كلها واجزاء من كندا
3- الجهاز دقيق بالنسبه للمحلات بنسبه 90 % لكن بعض المحلات تكون المحلات قد اقفلت وهذا طبيعي واعتقد انه يلزمني ان احدث الخرائط من الموقع. << يعني المشكله مني انا.
4- صعب فهمه فهو معقد نوعا ما ويحتاج وقت لادراك جميع ما فيه من مميزات لكن بالنسبه للأمور الاساسيه فهو سهل الفهم.
5- فقدان الاتصال بالاقمار الصناعيه في امكان المباني العاليه واعتقد انه هذا مشكله في جميع الاجهزه لكن لا يكون فقدان كامل بل فقدان متقطع لا يضر ولا يسبب لك اي مشكله.
اتمنى من الاخوان شراء مثل هذه الاجهزه لانها تختصر الوقت وتقي بعد حفظ الله من الضياع لكن اتمنى من الجميع شي مهم جدا جدا
هذا جهاز مثل جميع الاجهزه قد تتعطل في اي لحظه لذلك دائما دع معك خرائط ورقيه لامريكا والولايه التي تسكنها وكذلك المدينه حتى ترجع اليها وقت الحاجه
فالاخير اتمنى ان تكون استفدت من المعلومات وكذلك الاخوه الاعضاء والزوار واتمنى من الجميع اذا كان لديهم اضافه او تعديل او معلومه اضافتها.
