يا حُبْ يا مْسَوْسِحْ قلوبْ الْبَشَرْ
بْتـْرَجِّعْ الشايبْ لإيّامْ الوَلْدَنـــةْ
قـَوْلـَكْ بْشْباطْ رَحْ ينْزَلْ مَطـَـرْ؟
يشَتـّيْ بالوَردْ عَ كِلْ الدْنـــــيْ
وْ نِلـْتقيْ بَعْدْ مَا فـَرَّقـْنَا الـْقـَدَرْ
شَمْعْ وْ نْبيدْ وْ زْهورْ مْلـَوَنةْ
يا لـَيلْ دَخْلـَكْ لا تـْخَلّيْ السَهَرْ
يخْلـَصْ .. بَعدْ مَا شْبـِعْنـَا شَيـْطَنةْ
بْحَيثْ لَوْ تـْنـَقـْوَزْ عَ شبّاكـْنَا القـَمَرْ
البِرْدايةْ تـْغَارْ وْ صَوبنَا تِنْحِنيْ
يعَرْبـِشْ عَ كْتـَافـْنـَا عَنكَبوتْ السَكَرْ
يغـْزُلْ خيوطوْ بْألوانْ مْزَيـَّنةْ
هَالْعَاشِقْ المَغرومْ اْسْتـَنـَّىْ وْ نـَطـَرْ
مْوَاسِمْ الحُبّْ وْ إيّامْ الجَنيْ
مِنْ فـَيروزْ عَينَيها اسْرُقْ حَجَرْ
وْ اقْطُفْ منْ شفَافـْهَا أحْلَى سَوْسَنةْ
نْسَافِرْ بْأَحلامْنَا وْ مَا نِتْرُكْ خـَبَرْ
عَ دِنْيي جْديدةْ .. عَ العُمْرْ الْهَنــيْ
يا عيدْ عَنْ حُبّْنـَا لا تغضْ النـَظَرْ
فـَرِّحْ قـلوبْ العَاشقةْ بْهَالْدنيْ
وْ يا حُبّْ مَزَالـَكْ بْتـْقـَرِّبْ العُشّْاقْ
لـَيشْ عيدَكْ يَومْ واحِدْ بـِالْسنةْ
